مصر وغانا

للمره التانيه شفت الماتش النهارده .. بس وأنا لوحدي و هادي خالص ..
الحقيقه إحنا ما كناش وحشين أوي زي منا كنت فاكر في الأول و غانا ما كانتش
أحسن منا ولا حاجه .. أمال إيه الحكايه .. الحكايه إن فيه حاجات كتير عايز
أحكيها بعد ما شفت الماتش.
أولا: فريقنا فعلا كان ماسك كوره كو يس و بتمكن بس فعلا دفاع غانا قوي جدا
و كمان مركز مش زي معظم الفرق الإفريقيه و مهاراتهم الدفاعيه على المستوى
الفردي و ذكائهم يفكرك جدا بلاعيبتنا زي هاني سعيد و وائل جمعه .. عشان
كده جدا كان صعب جدا إختراقهم.
ثانيا: إحنا كان عندنا حلول .. ما كناش فاشلين هجوميا أوي يعني .. و كانت
الكورات العرضيه أحد أهم هذه الحلول بس الدفاع الجيد و عدم وجود رأس حربه
صريح و طويل و قوي زي عمرو زكي .. مخلناش نستفيد من تلك العرضيات ..
التصويبات كانت حل تاني بس ما كانش فيه حد كويس من اللعيبه في الموضوع ده.
ثالثا: إحنا فعلا عندنا مشكلة صانع ألعاب و للأسف مشكلة حسن شحاته إنه
بيلعب اللعيبه اللي ضامنهم حتى لو في غير مراكزهم .. يعني إحنا كنا فعلا
محتاجين خروج حسني عبد ربه و نزول رأس حربه آخر على أن يلعب زيدان كصانع
ألعاب .. و عندما تشاهد المباراه للمره الثانيه (كما فعلت أنا) فإنك ترى
حسني عبد ربه بالكاد يؤدي أي مهام دفاعيه و ينطلق أكثر للتكمله مع
المهاجمين .. فإذا كان كذلك أليس الأولى اللعب بمهاجم حقيقي كجدو أو السيد
حمدي أو أحمد رؤوف.. و لكن تلك مشكلة حسن شحاته و نظرية اللي أعرفه أحسن
من اللي ما عرفوش .. ومشكلة صانع الألعاب هذه مستمره منذ بداية الدوره فمع
الإحترام الكامل لأحمد حسن فليس هو أفضل لاعب لهذا المركز و خصوصا في
الماتشات المقفله زي النهارده
رابعا: اللاعيبه كانوا فعلا مجهدين و ظهر التعب جليا عليهم منذ الدقيقه 70
.. أنا عمري ماشفت وائل جمعه بالتساهل ده و الأخطاء الساذجه ديه .. الولد
كان شكله تعبان فعلا .. و ده سهل تخيله بعد الماتشات الصعبه اللي لعبوها و
الإجهاد النفسي و العصبي على عكس فريق غانا اللي لعب ماتش أقل و ماتشات
أسهل بكتير ده غير فرق السن و القوه الإفريقيه الطبيعيه
خامسا: أرضية الملعب اللي أول مره نلعب عليه على عكس فريق غانا اللي لعب 3
ماتشات عليه. الأرضيه كانت لحد ما سيئه و لم تساعد على تناقل اللاعبون
الكره بنفس الحريه و الدقه بتاعة الماتشات اللي فاتت
سادسا: أكيد كان فيه حذر و خوف في منتخب مصر فالمباراه كانت تتويج لمجهود
أكتر من 4 سنين شغل مش مجرد المجهود اللي إتعمل في الدوره الحاليه .. عشان
ياخدوا 3 بطولات على التوالي و يحققوا رقم قياسي صعب تكراره إن ما كانش من
المستحيل .. على عكس فريق غانا اللي ما كانش عنده حاجه يخسرها ..
الظريف بأه إيه .. إن لما منتخب مصر بدأ يتعب .. طمع منتخب غانا في الماتش
.. و رب ضارة نافعه .. فقد فريق غانا تركيزه الدفاعي الرهيب لدقائق ..
كانت كفيله الحمد لله للإتنين المهاجمين الحريفه و المهاريين في المنتخب
إنهم يخلصوا الماتش .. و فعلا جورج ويا إنتقد لاعبي غانا بعد المباراه
لهذا السبب
فعلا هي مقاله ملهاش لازمه بس أنا كنت مش مبسوط بعد الماتش و ما إستريحتش
غير لما شفت الماتش تاني .. وما كنتش حستريح خالص غير لما أشارككم
الكلمتين دول ألف مبروك لمصر و شكرا للجهاز الفني و كل أعضاء المنتخب ..
لإن الناس ديه بقالها سنين بتسعدنا و تدينا أمل و تضرب لنا أمثله حيه على
بعض القيم الأساسيه كالعمل و التوكل على الله و الحلم بحريه و الإيمان
بالذات .. دلوقتي ممكن أبطل أشجع كوره و أنا مستريح و ممكن كمان أبدأ
أحاول أطبق الحاجات الجميله ديه في أشياء ممكن أفيد بيها الناس أنا كمان
.. ممكن كمان أروح أنام .. لحسن الساعه بقت 5 الصبح .. شكرا شكرا شكرا ..
حسن شحاته .. شوقي غريب .. كل اللاعبين و الناس اللي بيشتغلوا معاكم في
الفريق ..
تصبحوا على خير
هاني الجمل 31 يناير 2010